由老婆陣痛到陪老婆入產房

剛剛二月尾,我家的小天使出左世啦

出世後忙於處理家裡大大小小事情,所以未能update

到今天過了兩個星期多,好多事都開始整頓好

現在可以慢慢分享一下呢個經歷與過程

(以下分享一下既野好多都可能係本人既一知半解,如若有更明確既知識或資訊,不妨提出及交流。利申:本人不是扮專家)

打呢篇文章只希望可以藉此跟一眾準爸爸交流交流

.

懷孕過左足月階段(37週-42週)

老闆同我既心情都變得開始緊張

因為陣痛係最好既一個指令同訊號

過左足月一日又一日,心情就緊張多一下

因為好自然父母就會多一分既擔心

點解未有陣痛既,點解乜點解物?

擔心多左,問題就自然多

其實準爸爸們要多加注意太太既情緒

因為佢個情緒係會影響生產既過程同陣痛既感受,我地少少既體貼同體諒係最佳良藥。

老闆都係38週過左一兩朝早突然痛左一下,果下痛係同平時完全唔同,當時大家都停止晒手上工作,立即系度計時睇下幾時再有下一次既陣(因為陣痛時既間距係好重要,絕對不能輕視)

但好無奈地當日再冇陣痛過多一次,咁唯有大家一齊去再等啦,

到左夜晚都係有d唔安心,咁一於走去醫院,咁當時都係夜晚十點左右到左瑪x醫院(老闆入院前已洗定頭同食定個晚餐)

咁記得帶齊身份證及走佬袋啦,因為入院果個位係系產房,咁除左丈夫之外,父母及其他親友都唔入得,同盡可能熄電話或唔好玩電話啦,因為入到產房位置整個氣氛已變得不一樣,咁辦理完入院手續後就要回家等啦。

(如果系產房比姑娘發現玩電話實比人罵瓜)

直至到左第二日

第二日初頭都好正常,老闆一直系醫院一d動靜都冇,咁我正常去番工,老闆就系醫院繼續等待陣痛出沒!

到了下午四點左右…電話響起!

咁我就飛車去醫院搵佢啦,咁去到見到老闆都有點面色不同,隔十至十五分鐘就痛一下,我以為佢咁樣已經叫好痛啦,原來唔係,我見到隔離有d太太痛得更誇張,痛既時間有d仲好多個小時…..

(唔可以唔認同女人真偉大)

咁太太們就算好痛都係未可以生得亦未可以落去產房,因為要開到度數先落去

咁由於過晒探訪時間老闆又食晒野,咁就唯有依依不捨咁番去屋企等消息啦

番去都要去梳洗一下

大概到左12點,電話再來了!

老闆既聲音已變得很喘,隔住個電話都能感覺到佢既痛,佢要落產房啦

我就立即飛車去醫院,到左產房大概12:30,但係唔比入去,只可以系外面等

系外面等既時間總覺得過得特別慢,心又急….

過左一個鐘左右終於叫啦:「xxx既丈夫請入黎啦!」

入到去產房後首先進行著袍好似消毒一樣

到左產床位置一打開門…

見到老闆痛到好似生不如屎一樣,當堂個心都離一離跳一跳…感到佢好辛苦

跟住護士話已做左「無痛」咁而家再吸「氣」可再減輕痛楚

咁打後既過程都過得感覺好混亂好緊張

因為又喊又叫又叫又嗌,咁當中幾樣都一定要特別要注意

媽媽痛時都要去吸「氣」減痛

對腳要打開,否則出左力都冇用

每發一次力去試生時就好似發功一樣

爸爸捉緊媽媽隻手比佢發力

幫佢抹汗打氣有心理準備要比佢打比佢咬(希望唔洗啦)

記得熄左部電話

經過一個多既鐘頭終於出左黎啦

咁見到BB後,我對眼開始朦朧起來

因為我對眼已充滿眼淚…

經過望住佢生阿B出黎,種感覺實在太神奇啦,太感動啦

咁剪臍帶就由姑娘夾好由我剪落應該剪既位置(作動時姑娘會問爸爸剪唔剪)

咁姑娘們幫阿B磅晒重度完野後就放番老闆度skin to skin(主要比BB感受番媽媽既心跳體溫及味道,等佢感到安全)

咁處理傷口,一家三口影張相

大概就係咁,如果有咩甩漏因爲小弟比較緊張

.

再次多謝大家花時間睇左咁耐小弟既分享

之後會分享老闆坐月及一d出院後需注意既事項

.

祝各位媽媽順利生產,BB快高長大身體健康

 


Related Posts